Şêra Kurdîstanî: Leyla Qasim

Vanê, wexto ke darde bîye, marşê Ey Reqibî wend. Seba azadîya kurdan da pêro, nameyê azadîye de kî canê xo kerd feda. Na ya hîkeyaya kilmek a Leyla Qasim:

Leyla Qasim serra 1952 Xaneqîn, Kurdîstanê Başûrî, de ameye dinya. Qasim panc domanan ra aya hîrêyine bîye. Melumatan ra gore aye domanîya xo feqirîye de vîyarte, badê ke Kerkûk de perwerdeyê xo dî, keyeyê xo ra bar kerd şî Bexdad. 16serrîya xo de rejîmê Baasî Îraq de hukmat ser ame. Leyla Qasim kî bîya endama PDK-Î. Qasim unîversîte de piştgirîya “Yekitîya Qotabiyên Kurdistanê” (Yewîya Wendekaranê Kurdîstanî) kerde. A rêxistine de Leyla Qasim mêrdeyê xo yê ameyoxî Cewed Hemewendî nas kerd. Înan pîya duştê rejîmê Baasî û derheqê rewşa kurdan de nuşte û meqaleyî nuştêne. O çax de Leyla Qasim qerar da ke a bikewo pêşmergeyan.

1974 de artêşa Îraqî duştê kurdan de dest bi herbêde giran kerd. Şaristanê Kurdîstanî ke amey bomba kerdene, keyeyê kurdî kî Bexdad ra amey vetene. No semed ra Leyla Qasim û çar hevalê aye yê şoreşgerî duştê nê herbê qilêrinî de qerar da ci ke yew teyaraya artêşa Îraqî biremnê. Labelê no plan serkewte nêbî û Qasim û hevalê xo 28. nîsane de amey pêgirewtene. 12. gulane 1974 de Leyla Qasim û çar şoreşgerê kurdî hetê rejîmê Baasî ra Bexdad de amey darde kerdene.

Vanê ke Leyla Qasim dardekerdiş ra ver sereberze bîye û va: “Mi bikişê, la na rastîye kî bizanê ke bi kiştişê mi bi hezaran kurdî do hewno giran ra hişyar bibê. Ez zaf keyfweş a ke bi serfirazî û raya azadîya Kurdîstanî de canê xo feda kena.” Kehanetê Qasim kî rast vejîya: dardekeridişê aye ra tepîya xeylê wendekarê Kurdîstanê Başûrî kewtî lejê mesela kurde, zafê înan kî vejîyay koyan ke seba azadîya Kurdîstanî pêro bidê.

dersiminfo