TEST-Wındows 8
Ma kî şîme sîstemo newe Wîndows 8 ceribna, netîce kî no yo:
Çîyo newe ke merdim verê veran vîneno: Wîndows 8 dîzaynêde nîp û newe de yeno. Tabî, zere ra hîna Wîndows o, yanî merdim Explorer (cigêrayoxê sîstemî), dosyayî, fonksîyonî ûsn. sey neslanê verênan ê Wîndowsî de cayê xo de vîneno, labelê serekran tam vurîyo. Serekekran nika applîkasyono xoser o, seke telefonê destan ê Mîcrosoft û Nokîa Wîndows Phone de asayîşê kareyan de vejîno. Her kare bi xo yew applîkasyon o, goreyê meylê xebitnayoxî vurîno.
Menuyê destpêkî kî şî, xebtinayoxî nika kuncanê ekranî ra eyar û menuyanê Wîndowsî keno ra. Tabî serekrano kan kî yeno weçînitene. Dîzaynê Wîndowsî vurîyayîşo tewr radîkal ê sîstemê neweyî yo. Henî aseno ke Mîcrosoftî semedê reqebetê Apple ra, ke nika seba dîzaynê xo namdar bîye, felsefeyê xo newe ra vurna. Yewna çî: Wîndows 8 bitaybetî seba komputura tabletan ame viraştene, yanî hem bêçikan ra tablet ya kî telefonê destan ser o, hem kî komputura normale de pê merre û klavye yeno xebitnayene.
Tena hetê dîzayn ra ney, zere ra kî sîstemê xebitnayîşî vurîya. Goreyê neslê verênî Wîndows 7, Wîndows 8 tenêna çîp û xefîf o. Tam 10 deqayan de barkerdişê sîstemî mumkîn o. Rakerdişê sîstemî kî zaf çîp beno. Bootkerdiş de Wîndows 8 28 sanîyeyan de beno ra (seba têverronayîş: Apple OS X 10.8 29 sanîyeyan de). Feqet webwendox Înternet Explorer 10goreyê Safarî yê Apple daha giran o.
Mewzuyêde bîn ke îstîqbalê komputuran de rolêde girs kay keno: “Cloud” (Hewr), yanî vîrê Înternetî. Pê programanê nîyanênan merdim besekeno her çîyê xo Înternet de wedaro, nîya komputura xo rê çîyê bar nêkeno û ser o kî besekeno her cayê dinya ra Înternet ra bikewo dosya û programanê xo. Apple, sey nimûne, komputur û hacetanê mobîlan bi xizmetê iCloud senkronîze kena. Wîndows 8 de applîkasyonê SkyDrîve no xizmet keno. SkyDrîve bêpere yo, labelê warantişê îCloud kî mumkîn o.
Torrê sosyalî sey Facebook, Twîtter, LinkedIn, Flîckr ûsn. Wîndows 8 de entegrebîyaye yê. Xebitnayoxî çîp besekenê aktîveteyanê xo yê sosyalan yew ca ra biramê. Bi hesabê xo yê bêpere yê Mîcrosoftî, xebitnayoxî zî besekenê her ca ra bikewê eyaranê xo yê taybetî yê Wîndows 8. Reqebetê bi Apple tîya kî bellî beno: Mîcrosoftî bazarê xo yê taybetî viraşt. Duştê naye de AppStore de xebitnayoxî herînayîşê produktanê Apple rê girêdaye yê.
Hema-hema zaf çîyî Wîndows 8 de mesela musayîşî yê. Xebtinayoxan ke Wîndowso verên ra hes kerd, da-des deqayan de musenê ro sîstemo newe. La eşkera yo ke programê kompleksî, mavajîme Photoshop, sey applîkasyon nêgureyenê. Coka bellî yo ke Wîndows 8 tablet û telefonanê destan ser o cîya, komputure ser o cîya yeno xebitnayene. Ge-ge vurnayîşê sîsteman kî merdim keno bêzar. (Resim: Microsoft)
Yorumlar
Yorum Gönder