Nuştox Seyîdxan Kurij ra derheqî folkorî Çewlîg de yewna kîtab Arwûn û Lûy – Sonikî Çoligî

Kîtabî rojnamewan / Nuştox Seyîdxan Kurij Arwûn û Lûy - Sonîkî Çoligî“ hetî "Weşanxaneyî Nûbihar“ ra ame neşirkerdiş. Seyîdxan Kurij 20 serrîyo ke folklorî kirdkî sero xebat keno, ey heta nika zaf sonikî, meseleyî, fikreyî, vateyî verênan û deyîrî arêkerdî û kovar û rojnameyanî kurdan de dayî neşirkerdiş.
Seyîdxan derheqî na xebatê xo de wina nuseno,Keyeyî ma di tim sonikî vacîyayîn. Sey zafê qicanî Kurdîstanî mi zî qijkekê xwi di şewanî zimistanî ê dergan di pîlanî xwi ra zaf sanikî gueştarî kerdî. Apî mi, baykî mi, dadîyê mi û emkênay mi hol sanikî vatîyen. Apî mi, mintiqê ma di yew çîrokbêjo namedar bi. Çi heyf ke apî mi rew merd, ez nieşkaya yi bidî qiseykerdiş. La mi cuwa pey emkênay xwi Qûmê Sêdxûnûn, mêrdê yay Şerîfî Farûn, biray xwi Diryeh, veyvê (vêvê) ma Cemîla, Xalê mi Yildiz û Hesen Can û çend kesanî bînan ra nuştî. Yin mi rî sanikî kerdî kasetan, mi kasetan ra nuştî.
Ez eşkena vacî ki, ina xebatê yew keyî ya, yanî yew xebata kolektîf a.”
Kîtabî „Arwûn û Lûy - Sonîkî Çoligî“ de 38 sonikî û 29 fiqreyî estî. Semedo ke wendoxi mintiqayanî bînan zî rehet biwanî Seyîdxan bi nameyî “Tayî Xususîyetî Fekî Çoligî” yew nuşte zî kîtab de neşir kerdo. No nuşte de nuştox fekî Çoligî û fekanî bînan yê kirdkî dano têvero û xususîyetanî fekî Çolîg îzah keno. Ancî kîtab de yew ferhengok zî esto. Penîyî kîtab de derheqî cuyê sonikvataoxan de zî malumat nusîyayo.
Kîtabî "Arwûn û Lûy - Sonîkî Çoligî“ xebatê Seyîdxan û xususîyetî sonikanî kirdkî sero vervateyî M.Malmîsanij û Mehmed S. Uzun zî ca genî.