5 gaman de flort

Ha cênc ha kokim, însanî weşîya xo de goreyê keyfê xo flort keno (kalikanê ma termê “flort”î nêzanayêne, vatêne “mordem sono welenge”). Ge-gane merdim ceribnayîşo xo yê biforsî de şeweşîno ra tede maneno, ge-gane kî bi serkewtiş ci ra vejîno.

Eee, madem ke merdimî qerar da ke şêro bextîyarîya xo ra bigêro, ha nawo ma ra panc pêşnîyazê flortî. Eke hîna nêbî, qusur made nîyo, pî û bira! Bize bi linga xo, merdim bi… Ti fehm kena yanî.

1. Her çî ra ver, gerek flortkar (ox çi çekuyêda weşe) rol-mol kay mekero, wa xo bo. Kam ke xo bî, sey waranê bînan ê heyatî de kî, flort de raya raste ra şono. Însanê tebîî otomatîk sempatî vînenê.
2. Gama dîyine de gerek merdim xoser bo, yanî gerek linganê xo ser o xoser o bimano ke tesîrê xo cinsîyeto bîn ser o qayîm bo. Seke vanê, dêso rast nêrijîno. Ferqê dês û merdimî (mavajîme, tayê merdimî estê ke nînan de no ferq hende bellî nîyo…) çim ê! Bi awiran û nîyadayîş, bi vindetişê wucudî yo rast û vengêde emîn merdim dormeyê xo ano binê kontrolê xo. Qayîtkerdiş û awiran xo vîr a mekerê ha! Bi çiman ra merdim eleqeya xo musneno, parçeyêde bîn ê leşe ra ney! Eke a kesa ke duştê şima de heyranê şima bena, ge-ge qafika xo çarnena heto rast ya kî çep ra, no normal o, meraq mekerê. Eke peşmirîya, silayîye ha verê şima der a…
3. Sînyalanê bêvengan ra tepîya êdî fekê xo rakerê û qisey bikerê. Bê qiseykerdiş her çî çewt û qineser şono. No semed ra peşmirîyayîş û kontakê çiman ra dime bi vengêde zelal qisey bikerê. Kam ke xeylê wext bêveng mend, efsûnê spontanîye mireno. Dîktatorîya mezgê xo caverdê, wa tenê zerrîya şima veng bido. Mewzûyê xoşebere kî qet muhîm nîyo. Çîyo ke muhîm o, hawaya şima ya qiseykerdişî ya. Ge-gane yew “Ma bixeyr”o rast kî bes o.
4. Badêna, bi îltîfat û komplîmanan ra atmosfer germ bikerê. Gerek komplîmanê şima zurî mebê! Ti ke vana, ma zuran ra kes nêmerdo, mesûlîyet ma de nîyo! Mîsal, bi cumleya sey “huyayîşê to zaf rindek o” dest pêbikerê, dima bi persan xoşebere raver berê. Persê henênî bibê ke muxataba şima xo ser o tenê qal bikero. Nîya hem şima aye nas kenê hem kî bara şima bena tenêna sivike.
5. Esnaya qiseykerdişî de hereket û wucudê muxataba xo de nîyadê, analîz bikerê. Ha se kena, awiranê xo de heyecan esto ya çin o, çitur vindena, senî nisena ro, kamcîn hetî rê xo çarnena… Sînyalê ke yenê, teqib bikerê. Eke pozîtîf ê, her çî rind şono. Wext ra wext kî rehet bê, leşa xo raverdê û bi rehetîya xo atmosferêde elzem virazê. Bêvengîya kilmeke ra kî metersê.
6. Heya heya, ma va ke panc pêşnîyazê ma estê. Ma se bî? Nîya şima quralo tewr muhîm ê flortî musenê: flort de qural-muralî çin ê! Ne peynîya flortî esta, ne kî florto bêqusur. Naye aqilê xo ra mevejê. Ge-ge heyat weş o.

Şima dî? Hende zor nîyo. Êdî mevajê ke bi kirmanckî flort nêbeno!
dersiminfo