Merd, ya ame kiştene? Jackson!
Astarê popi Michael Jackson, 25ê aşma amnaniya vırêne, 2009de Los Angeles'te merd. Gorê tıxtor û xebatkaranê dê, çan saati verê
merdena xo, Michael Jackson weş û war bi; a rojede prova qonserê xuyê Londra kerdêne. Jackson ke provade taê qefelino, prova cavırdano û şono aresinora. Çiyê waxt derbaz beno nêbeno, Michael Jackson xaftıla lerzneno û bina xo êna gurêtene. Nae ser, êê ke dormede tafte Jacksoni benê xestıxane. Çawo ke Jackson resnino xestıxane êndi bina xo serhev biya tenge û hêşê xo şiyo. Taêna bin ke maneno, kuno koma û qelbê xo vındeno. Tıxtori kenê nêkenê nêşkinê qelbê dê onciya bıxebetnê. Vırêndiye xebere êna ke Jackson kewto koma, feqet dirê saatê bini merdena dê bena eşkera û gaziye resena her caê dınya.
Merdena Michael Jacksoni, xusısi hêyrananê dê sero, biyê şokêde gıran. Xêlê caa siyayê dê ame gırêdaêne. Ebe sed hazara insani seba wedardaêna ceneza dê amêy têlewe; wertê cematê cenezade Mariah Careye, Lionel Richie, Jennifer Hudsone, Brooke Shieldse û Usheri ki bi. Ceneza 7ê aşma amnaniya dıdine, 2009de dariye we. Hetêra şin û şiwan bi, hetêra ki, derheqê merdena dêde taê şûfe bi. Mordemeko weş û war qêy, ya ki se wertê dirê saatade merdibi? Pêyjo ke dirê otopsi têdıma amêy kerdene, vêjiya mêydan ke, Michael Jacksoni verê merdene ilacê anesteziyê de zaf qewetli werdo.
Michael Jackson 1958de İndiana'de maa xora bi. New domanara domano hawtên bi. Piyê xo Joseph Walter Jackson fabriqade xebetiyênê, çêde ki xo bı xo gitar dênê pıro. Çawo ke bi wayirê domana, pıra pıra na xuya xo derbazê domananê xo ki kerde. Dirê seri tepya, Michael Jackson teba hirmina bıraanê xo Jackie, Tito û Jermainei ebe namê "The Jakcson Brothers" gurubê de amatore şanıte pê û pıra pıra bara û kulübade qonserê qışkeki day.
Michael Jackson gelê seri bıraanê xode piya xebetiya. Feqet pêyjo, xusısi ebe hunerê xuyê reqesiyayene, bıranê xora bıriya ra û ebe xo solo qonseri day. "Off The Wall", albûmê dêo arziyo verên, 1979de ke vejiya, êndi Ameriqa'de têyna nê, her caê dınyade namê xo ame heşnaêne. Sera 1982inede Michael Jackson kariyerê xuyê müzisyenênide vejiyare nike; albûmê xo "Thriller" hem ebe müzik hemı ki ebe reqasiyayena xo bazarê popi ser û bın kerd, rekorê rotene şıkıt. Ê albûmira tepya êndi "Şaê Popi" say bi û hatani merdena xo ki hêni mend.
Michael Jackson dı dolımi zewejiya. Dolıma vırêne, çêna Elvis Bresleyi Lisa Marie Presley de, dolıma dıdine ki Deborah Jeanne Rowe de zewejiya; dolıma vırêne 18 aşmi, dolıma dıdine ki 3 seri zewejiyaye mend.
Nê seranê pêênade derheqê Michael Jacksoni de gelê qesê vejiyay ke Jackson xo cerebnenore domananê qıja. Nê qesa sero mehkeme bira feqet axriyede şûjê Jacksoni sûbıt nêbi. Sera 2005de Michael Jacksoni Ameriqara barkerd û çêxo berd Bahreyn. Gorê taine Michael Jackson bibi musılman feqet musılmanêniya xo hona eşkera nêkerdibi.
Yorumlar
Yorum Gönder